Pormal nang inihain ni Vice President Sara Duterte ang kanyang tugon sa Senado, kung saan hiniling niyang ibasura ang kasalukuyang impeachment complaint laban sa kanya.
“Ang batas ay batas. Hindi ako natatakot sa pagsubok, pero hindi ko rin hahayaang baluktutin ang Saligang Batas para lamang sa pansariling interes ng iba. Paninindigan ko ang tama—hindi lang para sa sarili ko, kundi para sa tiwala ng taong bayan.” -Vice President Sara
Sa pamamagitan ng kanyang legal team mula sa Fortun, Narvasa & Salazar, inihain ang kanyang 35-pahinang "Answer Ad Cautelam" dakong alas-5:49 ng hapon sa tanggapan ni Senate Secretary Renato Bantug. Ayon sa dokumentong ito, iginiit ng Pangalawang Pangulo na ang reklamo laban sa kanya ay labag sa batas at hindi dapat kinikilala.
Ayon sa kanyang sagot sa korte, nilabag ng impeachment complaint ang tinatawag na “One-Year Bar Rule” sa ilalim ng Section 3(5), Article XI ng 1987 Constitution. Ibig sabihin, isang beses lang maaaring magsampa ng impeachment complaint kada taon laban sa isang opisyal na maaaring ma-impeach.
“Ang reklamo ay walang bisa mula sa simula pa lamang. Ito ay lumalabag sa Saligang Batas, kaya’t nararapat lamang itong ibasura,” ayon sa kanyang opisyal na pahayag.
Hindi rin raw nito isinuko ng Bise Presidente ang kanyang karapatang kuwestyunin ang hurisdiksyon ng korte, ngunit binigyang-diin na ang mismong pagkakapasa ng kasong ito ay labag sa batas.
Sa harap ng malalaking isyung kinahaharap ng bansa, ang hakbang ni VP Sara Duterte ay isang halimbawa ng pagharap sa problema sa legal at mahinahong paraan. Ipinakita niya na walang sinuman, kahit pa Pangalawang Pangulo, ang ligtas sa pagsusuri ng batas—ngunit sabay nito, lahat ay may karapatang ipaglaban ang katotohanan at hustisya.
Sa kasalukuyan, hinihintay pa ang magiging aksyon ng Senado sa kanyang kahilingan. Samantala, nananatili siyang matatag sa paninindigan niyang hindi siya dapat patawan ng kasong walang basehan sa batas.
Walang komento:
Mag-post ng isang Komento