Sa likod ng bawat tagumpay ay may kwento ng sakripisyo at ito ang patunay ni Tatay Bobby Torallo, isang taho vendor na walang ininda ang pagod, init ng araw, at pagod sa kalye para lamang matupad ang pangarap ng kanyang anak.
“Wala akong ibang pinangarap kundi ang makatapos siya. Taho lang ang puhunan ko, pero pangarap niya ang tinaya ko. Ngayong guro na siya, sulit ang bawat init at pagod,” pahayag ni Tatay Bobby, bakas ang saya sa kanyang tinig.
Kamakailan ay naging inspirasyon sa social media si Tatay Bobby matapos mamigay ng libreng taho bilang pagdiriwang sa pagkakapasa ng kanyang anak na si Teacher Rosebel Cielo Torallo sa Licensure Examination for Teachers (LET). Hindi ito simpleng selebrasyon ito ay taos-pusong alay ng ama sa anak na siyang bunga ng kanyang pawis at pagtitiis sa pagtitinda.
Ayon kay Tatay Bobby, hindi naging madali ang kanilang buhay. May mga panahong sila'y minamaliit at pinagtatawanan, lalo na’t nakikita siya araw-araw sa lansangan bitbit ang balde ng taho. Ngunit ginamit niya ang pangungutya bilang lakas upang itaguyod ang anak sa pag-aaral.
Si Teacher Rosebel naman ay hindi rin mapigil ang luha sa tagumpay nilang mag-ama. Aniya, ang bawat pagbuhat ng balde ni Tatay ay naging hakbang niya patungo sa entablado ng pagtatapos.
Ang kwento nina Tatay Bobby at Teacher Rosebel ay patunay na ang tagumpay ay hindi nasusukat sa kayamanan, kundi sa dedikasyon, sakripisyo, at pagmamahal ng magulang. Hindi baleng mapagod, mabasa ng ulan, o mabilad sa araw basta't may pangarap, kakayanin lahat.
Sa bawat lagok ng taho na pinamigay ni Tatay, kaakibat nito ang mensaheng “Huwag susuko.”
Saludo kami sa iyo, Tatay Bobby at sa lahat ng amang nagsisilbing haligi ng pangarap.
At para kay Teacher Rosebel, nawa’y maging inspirasyon ka rin sa maraming estudyanteng nangangarap tulad mo.
Walang komento:
Mag-post ng isang Komento