Sa mundo kung saan ang ilang bata ay nagrereklamo sa baon nilang hotdog o itlog, isang batang si Anika ang naging paalala sa maraming Pilipino kung paano magpasalamat sa maliit na biyaya at kung paanong ang masayang puso ay hindi nasusukat sa laman ng lunchbox.
“Hindi ko po naiisip na mahirap lang kami. Masaya po ako kasi may pagkain ako at nakakapasok ako sa school. Gusto ko pong maging teacher din balang araw,” – Anika
Ibinahagi ng public school teacher na si Ma’am Beyat Manga Paz ang nakakantig-damdaming karanasan nila ng kanyang estudyante. Sa kanyang post, sinabi niya:
“’Yung ibang bata nagrereklamo sa baon nila, samantalang itong student ko, ’nung kukunin ko na ’yung baon niya para buksan, mangga lang ’yung baon niya sa loob ng bag niya at nakangiti pa sa akin.”
Ayon kay Ma’am Beyat, hindi ito ang unang pagkakataong nakita niyang salat sa materyal na bagay ang ilang bata sa kanilang paaralan, pero ang ngiti ni Anika sa kabila ng simpleng baon ang tumama sa puso niya nang matindi.
Ang sitwasyon ni Anika ay repleksyon ng napakaraming kabataang Pilipino hindi sapat ang laman ng kanilang baon, pero puno ng pangarap, pananampalataya, at pasasalamat ang kanilang puso. Sa mundong ginagalawan natin ngayon na tila laging may kulang, ang bata ay naging paalala ng kasimplehan at kabutihan ng loob.
Hindi kailanman nasusukat sa dami ng pera o pagkain ang tunay na kayamanan ng puso. Minsan, isang mangga lang ang kailangan para ipaalala sa atin na may mga bata sa mundo na mas pinipili ang ngiti kaysa reklamo.
Walang komento:
Mag-post ng isang Komento