Sa gitna ng tumataas na bilang ng kumpirmadong kaso ng mpox (dating kilala bilang monkeypox) sa bansa, nilinaw ng Department of Health (DOH) na walang ipatutupad na lockdown o anumang uri ng mobility restriction.
“Hindi po kailangan ng lockdown. Ang mpox ay hindi airborne at hindi mabilis kumalat. Ipagpatuloy po natin ang kalinisan sa katawan, tamang impormasyon, at pag-iwas sa pekeng balita,” pahayag ng DOH.
Sa isang pahayag na inilabas sa social media noong Mayo 31, mariing pinabulaanan ng DOH ang kumakalat na mga maling balita na nagsasabing magkakaroon ng lockdown dahil sa mpox. Ayon sa ahensya, wala silang inilalabas na rekomendasyon tungkol dito at pinayuhan ang publiko na maging maingat sa mga pekeng impormasyon, lalo na kung may dala-dalang logo ng DOH.
“Walang lockdown kahit saan man sa Pilipinas. Fake news iyan,” giit ng DOH.
Ang paglilinaw ng DOH ay kasunod ng unang kumpirmadong kaso ng mpox sa Talisay City, Cebu na iniulat noong Mayo 29. Ayon sa ulat, pumanaw ang pasyente hindi dahil sa mpox kundi sa ibang komplikasyon sa kalusugan. Hindi pa malinaw kung paano nakuha ng pasyente ang virus.
Ayon sa World Health Organization (WHO), ang mpox ay hindi airborne at hindi rin kasing bilis ng COVID-19 sa pagkalat. Ito ay naipapasa sa pamamagitan ng malapitang skin-to-skin contact. Karaniwang sintomas ay lagnat, rashes, pananakit ng katawan, at panghihina.
Ang kasalukuyang outbreak ay Clade II, isang mas banayad na variant. Karamihan sa mga pasyente ay gumagaling sa loob ng 2 hanggang 4 na linggo.
Pinayuhan ng DOH ang mga taong madalas makisalamuha sa iba—lalo na ang mga healthcare workers—na magsuot ng face mask, lalo kung may sintomas ang nakakasalamuha.
Bagama’t nakakabahala ang pagtaas ng kaso ng mpox sa bansa, pinawi ng DOH ang takot ng publiko sa pamamagitan ng malinaw na pagtutuwid ng maling impormasyon. Wala umanong dahilan para magpanic o maghanda ng lockdown, dahil ang mpox ay kontrolado at hindi malawakang nakakahawa.
Ang pinakamahalagang armas kontra takot? Tamang impormasyon. Sa halip na magpakalat ng haka-haka, alamin muna ang totoo—at makilahok sa pagprotekta ng kalusugan ng bawat isa.
Walang komento:
Mag-post ng isang Komento