Isang simpleng kilos ng kabutihan ang nagbigay inspirasyon sa libu-libong netizens matapos mag-viral sa social media ang kwento ng isang lola na pinakain sa isang Jollibee branch sa Calamba Crossing kahit 20 pesos lang ang dala niya.
“Hindi ko po sila kilala, pero gusto ko silang pasalamatan. Ang kabutihan nila kay lola ay isang paalala na may pag-asa pa sa mundong ito.” – Marold, nakasaksi
Ayon sa nakasaksing si Marold, galing umano sa palengke ang lola at mukhang pagod at gutom nang dumating sa fast food chain. Umupo muna ito sa isang mesa at ilang sandali pa’y tumayo na may hawak na 20-pesos — halatang nag-aalangan kung may mabibili ba siya sa halagang iyon.
Pero sa halip na bastusin o hindi pansinin, lumapit ang isang crew at iniabot kay lola ang isang burger steak meal na may kanin, iced tea, at tubig — kumpletong pagkain para sa isang pagod na katawan. Kitang-kita sa mukha ni lola ang tuwa at pasasalamat habang masayang tinatangkilik ang pagkaing inialay sa kanya.
Ayon kay Marold, “Napaka-bait nila. Hindi ko napigilang kuhanan sila ng litrato dahil sa kabutihan nila. Pasensya na po sa pagkuha ng picture nang walang permiso, pero gusto ko lang talagang ibahagi kung gaano sila kabait.”
Sa panahong maraming nawawalan ng pag-asa, ang mga ganitong simpleng kwento ng malasakit ang nagpapaalala sa atin na hindi kailangang maging mayaman para tumulong. Minsan, ang pagiging tao lang ang pagiging mapagmalasakit at maunawain ay sapat na para maging liwanag sa araw ng iba.
Walang komento:
Mag-post ng isang Komento