Sa isang emosyonal na mensahe, nanawagan si Congressman Paolo “Pulong” Duterte sa mga Pilipino sa loob at labas ng bansa na patuloy na ipanalangin ang dating pangulo na si Rodrigo Duterte, na kasalukuyang nasa kustodiya ng International Criminal Court (ICC) sa The Hague, Netherlands.
“Sana ay hindi kayo mapagod sa pagdarasal na makauwi na ang ating mahal na Presidente Rodrigo,” ani Pulong sa isang video message noong Mayo 26. “Gaya ng sabi niya, ang kanyang buhay ay isinakripisyo niya para sa bayan mula pa noon hanggang ngayon.”
Ayon kay Congressman Pulong, panahon na para makabalik sa bansa ang kanyang ama upang maranasan naman nito ang tahimik na pamumuhay bilang isang “super senior citizen” — matapos ang dekadang paglilingkod sa bayan.
“Sa edad niya ngayon, nararapat lang na ibalik siya sa bayan na kaniyang pinakamamahal… para maranasan naman niya ang mamuhay bilang isang super senior citizen,” dagdag pa ng kongresista.
Hindi rin nakalimot si Pulong sa mga patuloy na sumusuporta sa kanyang ama. Buo ang kanyang pasasalamat sa mga nananatiling matatag sa kabila ng kontrobersiya.
“Tinatanaw namin itong isang malaking utang na loob,” aniya.
Mahigit dalawang buwan na ang nakalilipas nang maaresto si dating Pangulong Duterte upang humarap sa mga kasong crimes against humanity kaugnay ng kanyang giyera kontra droga.
Bagama’t mainit pa rin ang diskusyon sa loob at labas ng bansa, nananatiling buo ang suporta ng ilang sektor at personalidad, kabilang na ang kanyang mga anak.
Habang patuloy ang usapin sa internasyonal na korte, hindi nawawalan ng pag-asa ang pamilya Duterte—lalong-lalo na si Pulong—na balang araw ay muling makakauwi si Tatay Digong upang tahakin ang buhay bilang isang karaniwang mamamayan.
“Alam naming mabigat ang pinagdadaanan ng aming pamilya, pero mas mabigat ang pagmamahal ng taongbayan kay Tatay Digong. Huwag po nating hayaang mawala ang pananalig na siya'y makakabalik,” pagtatapos ni Rep. Paolo Duterte.
Walang komento:
Mag-post ng isang Komento