Sa harap ng patuloy na pagbulusok pababa ng tiwala ng publiko kay Pangulong Ferdinand “Bongbong” Marcos Jr., umaasa si Senate President Pro Tempore Panfilo “Ping” Lacson na hindi hihina ang pangulo sa laban kontra korapsyon sa natitirang bahagi ng kanyang termino.
“Umaasa akong hindi matitinag si President Marcos sa laban sa korapsyon. Nasimulan na sana niya ang momentum pero malinaw sa mga survey na hindi pa naniniwala ang taumbayan. Kaya tulad ng dati, mag-iimbestiga ako. Kailangan mailantad ang katotohanan.” -Sen. Ping Lacson
Ayon kay Lacson, nasimulan na sana ni Marcos ang isang makabuluhang hakbang nang bitawan nito ang tanyag na linyang “Mahiya naman kayo!” sa kanyang State of the Nation Address (SONA). Para kay Lacson, iyon ang sandaling inaasahang magbibigay ng lakas at kredibilidad sa Pangulo upang seryosohin ang pagsugpo sa katiwalian.
Giit ni Lacson, malinaw sa mga pinakahuling survey na hindi paborable ang pananaw ng mga Pilipino sa pamumuno ni Marcos lalo na pagdating sa isyu ng good governance at anti-corruption. Ang pagbaba ng trust at approval ratings ng Pangulo, ayon sa senador, ay indikasyon ng lumalawak na pangamba at pagkadismaya ng taumbayan sa direksyon ng kasalukuyang administrasyon.
Hindi umano titigil si Lacson sa pagtutok at pag-iimbestiga ng mga anomalya sa pamahalaan. Ayon sa kanya, tungkulin niya bilang mambabatas na ipaglaban ang katotohanan at tiyaking mananagot ang sinumang sangkot sa katiwalian mapa-opisyal man ng gobyerno o mataas na personalidad.
Walang komento:
Mag-post ng isang Komento