Hindi napigilang maging emosyonal ni Anjo Yllana nang ibahagi niya ang kanyang labis na pasasalamat at utang na loob sa kanyang matalik na kaibigan na si Willie Revillame. Sa gitna ng mga pagsubok sa kanyang karera at personal na buhay, nanatiling sandigan ni Anjo ang kilalang TV host at negosyante.
Matapos ang pagkawala ni Anjo sa Eat Bulaga!, aminado siyang dumaan siya sa mahirap na yugto ng kanyang buhay. Dahil dito, lumapit siya kay Willie hindi lang upang humingi ng tulong, kundi upang muling buuin ang kanilang pagkakaibigan.
“Matalik kong kaibigan si Willie, matagal ang pinagsamahan namin niyan. Very close kami ni Willie. Nag-reach out ako sa kanya, e, mabait naman si Willie,” ani ni Anjo.
Ibinahagi rin ni Anjo na tinulungan siya ni Willie hindi lang sa pinansyal na aspeto kundi pati sa moral na suporta. Ngunit ang pinakanakakataba ng puso, ayon sa kanya, ay nang ayawan ni Willie ang kanyang alok na bayaran ang utang.
“Galante si Willie. Tinulungan ako ni Willie at ang gusto ko sa lahat, ayaw niya akong pagbayarin sa mga utang ko sa kanya,” dagdag pa ng aktor.
Ayon kay Anjo, si Willie ay hindi lang basta artista o host, kundi isang taong marunong tumanaw ng pinagsamahan at hindi nang-iiwan sa oras ng pangangailangan. Dahil dito, naniniwala siyang karapat-dapat si Willie na hangaan hindi lang sa telebisyon kundi sa totoong buhay.
“Hindi ko makakalimutan ‘yung kabutihan niya. Sa showbiz, bihira ang tunay na kaibigan pero si Willie, isa siya doon. Ang utang na loob ko sa kanya, hindi kayang tumbasan ng pera.”
Ang kwento ng pagkakaibigan nina Anjo Yllana at Willie Revillame ay nagpapatunay na sa mundo ng showbiz, kung saan madalas ay pansamantala ang samahan, may mga tunay pa ring taong marunong magmahal at tumulong nang walang hinihinging kapalit.
Walang komento:
Mag-post ng isang Komento