Tatlong malalaking personalidad mula sa ABS-CBN noontime show na It’s Showtime — Ogie Alcasid, Vice Ganda, at Anne Curtis, ang nagkumpirma ng kanilang pagdalo sa mga nakatakdang kilos-protesta laban sa korapsyon sa darating na Linggo, Setyembre 21, 2025.
Kinumpirma ni Ogie Alcasid na dadalo siya sa EDSA People Power Monument, kasama marahil ang kanyang kapatid.
“On Sunday, I will be there in EDSA with my sister maybe. Basta I will be there. Fifty-eight na ako. This is more than anything else. This is all about us na, e.”
Nilinaw niya na ang pagkilos ay hindi partisan at walang kulay politika.
“Kaya ‘yong nakikita ko na walang pink, walang dilaw, totoo ‘yon, e. Lahat na tayo ito. This has no political color.”
Dagdag pa niya, bagama’t nakakagalit at nakakalungkot ang patuloy na korapsyon, hindi sapat ang galit lamang — kailangan itong sabayan ng pagkilos at pagkakaisa.
Si Vice Ganda naman ay inaasahang dadalo sa hiwalay na protesta sa Luneta Park, Manila. Kilala si Vice bilang isa sa mga pinakamalakas na boses laban sa katiwalian, at muli niyang gagamitin ang kanyang plataporma upang hikayatin ang publiko na magpakita ng sama-samang paninindigan.
Hindi rin nagpahuli si Anne Curtis, na nagkumpirma ring makikilahok. Hindi man tinukoy ang eksaktong lugar ng kanyang pagdalo, malinaw ang kanyang mensahe: “It’s time we use our voices to end corruption in our country para sa mga anak natin at para sa future generation of Filipinos. See you tomorrow!”
Ang sabayang pagkilos na ito ay kasunod ng mainit na usapin tungkol sa mga anomalya sa flood control projects na kinasasangkutan umano ng ilang opisyal at contractor. Pinaniniwalaan ng marami na ito na ang oras para ang sambayanang Pilipino ay tumindig laban sa matagal nang suliranin ng bansa—ang korapsyon.
Ang paglahok nina Ogie Alcasid, Vice Ganda, at Anne Curtis sa darating na protesta ay malinaw na mensahe: ang laban kontra katiwalian ay hindi lang laban ng politiko, kundi laban ng bawat Pilipino.
Walang komento:
Mag-post ng isang Komento