Hindi nanahimik si Vice Ganda sa usapin ng responsibilidad ng mga magulang sa kinabukasan ng kanilang anak. Sa isang viral na pahayag, tahasang sinabi ng komedyante na kung lumaki ang isang tao na hirap na hirap sa buhay, malaki ang pananagutan ng kanyang magulang dito.
“Kung lumaki kang ang hirap-hirap ng estado mo, kagagawan ‘yun ng magulang. Kaya dapat nahihiya rin ‘yung magulang,” ani Vice Ganda.
Dagdag pa ni Vice, sa mahal ng bilihin at taas ng gastusin ngayon, hindi na sapat ang pagiging minimum wage earner kung balak mong bumuo agad ng pamilya. Ayon sa kanya, kailangang unahin muna ang sariling katatagan sa buhay bago pasukin ang pagiging magulang.
“Sa panahon ngayon kapag minimum wage earner ka lang, ‘wag ka na muna magpamilya. Sikapin mo muna makapag-ipon. Sa mahal ng bilihin, baka kulang pa sa sarili mo ‘yung sahod mo, tapos mag-aanak ka pa,” dagdag niya.
Ang pahayag ni Vice ay umani ng sari-saring reaksiyon. May mga pumabor, lalo na ang mga kabataang dumaranas ng kahirapan na dulot umano ng kapabayaan ng kanilang mga magulang. May ilan ding hindi sang-ayon at nagsasabing hindi dapat isisi lahat sa magulang ang kapalaran ng anak.
Gayunpaman, malinaw ang mensahe ni Vice Ganda: Ang pagiging magulang ay hindi basta-basta. Ito ay responsibilidad na nangangailangan ng maingat na pagpapasya at sapat na kahandaan sa emosyonal, pinansyal, at moral na aspeto.
Ang panawagan ni Vice Ganda ay hindi upang manisi, kundi upang magmulat. Sa isang mundong puno ng krisis, mahalagang magplano, magsikap, at maging responsable bago bumuo ng sariling pamilya. Dahil sa dulo ng lahat, ang mga anak ang direktang naaapektuhan ng kakulangan sa paghahanda. At gaya ng mensahe ni Vice, “Ang magulang ay hindi lang tagapanganak, sila dapat ang unang tagapagligtas.”
Walang komento:
Mag-post ng isang Komento