Hindi madali ang buhay guro, lalo na kung ang paaralang pinagtuturuan mo ay nasa gitna ng kabundukan at kailangang tawirin ang rumaragasang ilog upang marating. Ngunit para kina Teacher Julieta at Teacher Bernadeth, ang hirap at panganib ay hindi hadlang sa kanilang paninindigan bilang tagapagturo at tagapagdala ng pag-asa.
“Hindi madali ang araw-araw naming paglalakbay, pero para sa mga batang sabik matuto, sulit ang bawat hakbang at tawid ng ilog. Hindi lang kami nagtuturo naghahatid kami ng pag-asa.” -Teacher Julieta
Sa mga larawang kumalat sa social media, makikitang bitbit nila ang kanilang gamit habang tinatawid ang agos ng ilog papunta sa Akbual IP School sa Barangay Upper Suyan, Malapatan, Sarangani. Ito ay isa sa mga tinatawag na “Last Mile Schools” ng Department of Education mga paaralang malalayong marating at kadalasang kulang sa teknolohiya, kalsada, at batayang serbisyo.
Dahil sa dedikasyon nina Teacher Julieta at Teacher Bernadeth, hindi lang kaalaman ang nadadala nila sa mga batang katutubo kundi inspirasyon din sa buong bayan. Ang kanilang mga larawan ay umani ng papuri mula sa netizens, at nagsilbing paalala na ang tunay na serbisyo ay hindi sinusukat sa kaginhawahan kundi sa sakripisyong handang ibigay para sa iba.
Ang kuwento nina Teacher Julieta at Teacher Bernadeth ay patunay na ang pagiging guro ay hindi lang trabaho ito ay isang bokasyon ng puso at malasakit. Sa kabila ng kakulangan sa pasilidad at peligro ng biyahe, pinili pa rin nilang itaguyod ang karapatan ng bawat bata sa edukasyon.
Sana'y magsilbi itong paalala na ang tunay na pagbabago ay nagsisimula sa mga taong handa magsakripisyo para sa kinabukasan ng kabataan.
Walang komento:
Mag-post ng isang Komento