Diretsahang panawagan ang binitiwan ni PNP Chief Gen. Nicolas Torre III para kay dating Presidential Spokesperson Atty. Harry Roque: “Sumuko ka na.”
Ito’y kasunod ng pagkakadawit ni Roque sa kasong qualified human trafficking na may kaugnayan sa isang operasyon sa Philippine Offshore Gaming Operator (POGO) facility. Sa isang panayam, iginiit ni Gen. Torre na hindi dapat gawing isyu sa kalsada ang kaso. Sa halip, dapat itong harapin ni Roque sa tamang proseso ng batas.
Ayon sa ulat, hindi ordinaryo ang kasong kinakaharap ni Atty. Roque dahil maraming biktima ang sangkot. Si Roque ay kabilang umano sa 51 akusado sa operasyon ng POGO kung saan dalawang suspek na ang nahuli ng mga otoridad. Puspusan pa rin ang paghahanap sa natitirang mga kasabwat.
Dagdag ni Gen. Torre, nakikipag-ugnayan na rin ang PNP sa International Criminal Court (ICC) upang mas mapadali ang pagpapauwi kay Roque kung sakaling nasa ibang bansa na ito.
“Abogado si Roque. Alam niya ang proseso. Hindi ito ordinaryong kaso. Ang mas tama ay harapin niya ito. ‘Wag nang ilabas pa sa kalsada sa pamamagitan ng rally.”
Dagdag pa niya:
“Mahaba-haba pa ang laban na ’to. Mahaba-haba pang trabaho. Pero hindi kami titigil.”
Ang qualified human trafficking ay isang mabigat na kaso sa ilalim ng batas. Kung mapatunayang may pananagutan, maaaring maharap ang isang indibidwal sa habambuhay na pagkakakulong, bukod pa sa milyon-milyong multa.
Malinaw ang mensahe ng bagong PNP Chief: walang sinuman ang above the law—kahit pa ito’y dating opisyal ng gobyerno. Sa panawagan ni Gen. Torre, binigyang-diin niya ang pangangailangang harapin ang batas ng may dignidad at pananagutan.
Habang patuloy ang imbestigasyon at operasyon kontra sa mga sangkot sa iligal na aktibidad ng POGO, umaasa ang publiko na mananaig ang katarungan at hindi politika o impluwensya ang mangingibabaw.
Walang komento:
Mag-post ng isang Komento