Hindi pinayagan ng International Criminal Court (ICC) si Senadora Imee Marcos na bumisita kay dating Pangulong Rodrigo Duterte sa Scheveningen Prison sa Netherlands, ayon sa rebelasyong ginawa ni Vice President Sara Duterte.
"Kahit hindi pinayagan si Senadora Imee, nakita naman ng aking ama ang suporta ng maraming Pilipino. Ang mahalaga ay alam niyang hindi siya nag-iisa sa laban na ito." - VP Sara
Ayon kay VP Sara, nasabi niya kay dating Pangulo Duterte na naroroon din si Sen. Imee sa The Hague upang magpakita ng suporta, ngunit hindi ito binigyan ng permiso ng ICC na makabisita.
“Binanggit ko sa kanya na nandito si Sen. Imee Marcos pero hindi siya pinayagan ng ICC na makabisita at makausap si dating Pangulong Rodrigo Duterte,” ani VP Sara.
Ayon sa panuntunan ng ICC, tanging mga immediate family members (katulad ng anak, asawa, o magulang), legal counsel, konsular na kinatawan, at spiritual adviser lamang ang pinahihintulutang dumalaw sa mga nakakulong na akusado sa kanilang custody.
Dahil hindi kabilang si Senadora Marcos sa alinman sa mga kategoryang ito, tinanggihan ang kanyang kahilingan na makabisita.
Sa kabila ng limitasyon, pinayagan ang mismong anak ng dating Pangulo—VP Sara Duterte, at ang kanyang inang si Elizabeth Zimmerman, na makadalaw sa loob ng detention center noong Mayo 30, isang araw bago ang ika-47 kaarawan ni VP Sara.
Bagamat maikling panahon lamang ang kanilang pagdalaw, tiniyak ni VP Sara na nasa maayos na kalagayan ang kanyang ama.
Sa kabila ng pagnanais ni Sen. Imee Marcos na personal na magpakita ng suporta sa kaibigang si dating Pangulong Duterte, malinaw na mas pinaiiral ng International Criminal Court ang kanilang mahigpit na patakaran. Ang hindi pagpapahintulot sa bisita ay isang paalala na pantay ang pagtingin ng korte, anuman ang estado sa buhay o posisyon sa gobyerno ng isang tao.
Walang komento:
Mag-post ng isang Komento