Isang napakasakit na trahedya ang yumanig sa lungsod ng Damascus, Syria, matapos ang isang suicide bombing na naganap sa loob ng Mar Elias Church nitong Linggo habang isinasagawa ang banal na misa. Ayon sa Syrian Observatory for Human Rights, 20 katao ang nasawi at marami pa ang sugatan matapos ang malagim na insidente.
"Narinig ko ang dasal bago ang pagsabog... pagkatapos ay puro sigawan at luha na lang. Pero kahit nangyari ito, hindi kami titigil sa pananampalataya. Ang simbahan ay hindi lang gusali kami ang simbahan, at mananatili kaming matatag." – Ameen Youssef, isa sa mga survivor ng pagsabog
Base sa ulat, isang lalaki ang pumasok sa simbahan habang taimtim na nananalangin ang mga deboto. Hindi inaasahan ng lahat na ito pala ay isang suicide bomber. Sa isang iglap, sumabog ang bomba na nakakabit sa kanyang katawan, agad na pumatay at sumugat sa maraming inosenteng naroroon.
Ang Syrian Civil Defense ay patuloy pa rin sa pagkilala sa mga biktima at pagtukoy sa aktwal na bilang ng mga nasawi at nasaktan.
Pinaniniwalaang kasapi ng Islamic State (IS) ang suspek, ngunit wala pa itong opisyal na pag-ako ng responsibilidad. Matagal nang nagkakaroon ng tensyon sa rehiyon, at ang atakeng ito ay panibagong dagok sa mga mamamayang naghahangad ng kapayapaan at pananampalataya.
Ang nangyaring trahedya sa Mar Elias Church ay isang paalala ng patuloy na panganib na kinahaharap ng mga inosente sa mga lugar ng sigalot. Ngunit higit sa lahat, ito ay panawagan sa buong mundo na sa gitna ng paniniwala at pananampalataya, kailangang maging mas matatag ang ating pagkakaisa laban sa terorismo.
Sa kabila ng lungkot at takot, nananatiling buo ang pananalig ng mga Syrian sa kanilang pananampalataya.
Walang komento:
Mag-post ng isang Komento