Maraming netizens ang muling na-inspire kay Marvin Agustin matapos niyang balikan ang kanyang naging buhay bago sumikat sa showbiz. Sa isang viral na post, proud na ibinahagi ng aktor ang kanyang mga karanasan bilang waiter, janitor, cashier, bartender, kitchen help, at sekyu sa isang restaurant noong 1995.
Ayon kay Marvin, nagsimula siyang magtrabaho sa Tia Maria’s Mexican Restaurant, kung saan araw-araw ay nag-iiba-iba ang kanyang mga tungkulin dahil sa kakulangan ng tauhan at mahina ang benta ng establisyemento noon.
“Dito ako natutong respetuhin at mahalin ang kahit anong klaseng trabaho. Lahat ginawa ko – waiter, bar tender, kitchen help, cashier, minsan sekyu o janitor. Hahaha!” pagbabahagi ni Marvin.
Hindi naging madali ang lahat para sa kanya, ngunit ayon sa aktor, ang lahat ng karanasang ito ang siyang nagturo sa kanya ng disiplina, respeto, at tiyaga. Ang pagiging all-around crew daw ang nagsilbing pundasyon ng kanyang tagumpay sa industriya at sa negosyo.
“Ang sarap pagdaanan at kuhanan ng leksyon ang mga panahon na susubukin ka ng buhay. Kaya laban lang ng laban. Walang makakatalo sa taong ayaw magpatalo!” ani Marvin.
Ngayon, si Marvin ay hindi na lamang kilala bilang aktor kundi isa na ring matagumpay na negosyante sa larangan ng pagkain. Ngunit sa kabila ng mga naabot niya sa buhay, hindi pa rin niya kinakalimutan kung saan siya nagsimula.
Ang kwento ni Marvin Agustin ay paalala sa lahat na hindi kailanman nakakahiya ang magsimula sa maliit. Sa halip, ito ay patunay na ang tunay na tagumpay ay galing sa tiyaga, sipag, at respeto sa bawat hakbang ng buhay.
Kung kaya’t sa mga kabataan at nangangarap diyan, huwag ikahiya ang anumang trabaho basta ito ay marangal.
“Lahat tayo may simula. At kung mamahalin mo ang proseso, dadalhin ka niyan sa lugar na pinapangarap mo,” pahayag ni Marvin sa dulo ng kanyang post.
Tunay ngang si Marvin Agustin ay hindi lang mahusay sa pag-arte, kundi mahusay din sa pagpupunyagi at pagpapakatotoo sa buhay.
Walang komento:
Mag-post ng isang Komento