Isang kakaibang tagpo ang nasaksihan ng mga pasahero ng MRT-3 noong Linggo, Hunyo 1, nang sumakay mismo sina Pangulong Ferdinand “Bongbong” Marcos Jr. at ang kanyang pamilya sa tren bilang bahagi ng opisyal na paglulunsad ng "Family Fare 1+3 Promo" para sa MRT-3 at LRT-2.
“Ito po ay isa sa mga paraan para gawing mas abot-kaya at mas komportable ang biyahe ng pamilyang Pilipino. Hindi lang ito tungkol sa libreng sakay, kundi sa pagbibigay-halaga sa oras na magkakasama ang bawat pamilya,” ani Pangulong Marcos sa kanyang talumpati.
Sa GMA-Kamuning Station, pinangunahan ng Pangulo ang programa kasama ang kanyang asawa, First Lady Liza Marcos-Araneta, at kanilang mga anak na sina Sandro, Simon, at Vinny Marcos. Present din sina Transportation Secretary Vince Dizon, PCO Secretary Jay Ruiz, at iba pang matataas na opisyal ng gobyerno.
Sa ilalim ng promo na ito, isang paying adult commuter ang pwedeng magsama ng tatlong batang may edad 18 pababa nang libre sa pamasahe. Layunin ng programa na hikayatin ang mas maraming pamilyang Pilipino na gumamit ng pampublikong transportasyon, lalo na tuwing weekends at holidays.
Marami ang napangiti at nagulat sa mga pasaherong hindi inaasahang makasabay ang Pangulo at ang kanyang pamilya. Ipinahayag ng ilan ang kanilang tuwa sa pagiging hands-on ni PBBM sa pagpapakilala ng mga bagong serbisyo ng gobyerno.
Ang pagsakay ng Pangulong Marcos at ng kanyang pamilya sa MRT-3 ay simbolo ng kanilang layunin na ilapit ang gobyerno sa mga mamamayan, hindi lamang sa salita kundi sa gawa. Sa pamamagitan ng Family Fare 1+3 Promo, bukas ang pag-asa na mas marami pang pamilyang Pilipino ang makikinabang sa abot-kayang biyahe — isang hakbang patungo sa mas inklusibong transportasyon at mas solidong pamilyang Pilipino.
Walang komento:
Mag-post ng isang Komento