Isang makasaysayang desisyon ang inilabas kamakailan ng Metropolitan Trial Court Branch 3 sa Maynila: hinatulan ng dalawang (2) taong pagkakakulong at multang ₱100,000 si Jung Seongho, isang Korean national, dahil sa brutal na pagpatay sa isang inosenteng Aspin na si Erika.
“Hindi lang si Erika ang pinaglalaban natin dito. Siya ang simbolo ng lahat ng hayop na inaabuso at hindi binibigyang halaga. Sa desisyong ito, pinapatunayan nating may hustisya para sa mga walang boses,” — PAWS Representative
Ang insidente ay naganap noong Marso 9, 2024 sa isang restaurant sa Malate, Maynila—ang mismong lugar kung saan tumira at minahal si Erika ng komunidad. Si Erika ay kilalang mabait na aso sa lugar, palaging nandoon para sa mga parokyano at kawani ng kainan. Ngunit sa di-inaasahang pangyayari, sinugod at sinaksak siya ng apat na beses gamit ang kutsilyo ng restaurant mismo ng akusado habang siya ay tahimik lamang na nakaupo sa labas ng establisyemento.
Sa hatol na isinulat ni Presiding Judge Hon. Peter Steve G. Lim, inilahad na walang alinlangang napatunayan ng Prosecution ang pagkakasala ni Jung. Ang testimonya ng mga saksi ay nagsabing si Erika ay hindi naging agresibo—kaya malinaw na walang dahilan ang marahas na pag-atake.
Dahil sa mabilis na pag-aksyon ng mga saksi, agad nilang isinagawa ang isang citizen’s arrest at tinawag ang mga awtoridad. Dahil dito, si Jung ay naaresto kaagad bago pa man magsimula ang mga formal na pagdinig.
Ang kaso ni Erika ay isang paalala na ang kabutihan at malasakit ay hindi natatapos sa tao lang. Sa tulong ng matapang na mga testigo, mabilis na pag-aksyon ng mga pulis, at matibay na suporta ng mga organisasyong tulad ng PAWS, nabigyan ng katarungan ang isang aspin na walang kalaban-laban.
Ang pagtrato natin sa mga hayop ay repleksyon ng ating pagkatao. Kung gusto natin ng makataong lipunan, dapat kasama rin ang mga hayop sa ating pangangalaga. Kaya sa susunod na makasaksi ka ng kalupitan—huwag lang kumuha ng video, tumawag ng pulis.
Walang komento:
Mag-post ng isang Komento