Kinumpirma ng Department of Social Welfare and Development (DSWD) na sasailalim sa drug rehabilitation si Rose, mas kilala ngayon bilang "Imburnal Girl," matapos siyang mag-viral sa social media dahil sa video kung saan siya ay nakita mula sa loob ng isang imburnal sa Makati City.
“Tinatanggap ko po ang tulong at susubukan ko pong magbago. Gusto ko pong magkaroon ng panibagong simula at makabangon sa buhay,” pahayag ni Rose.
Sa isang pahayag noong Hunyo 9, sinabi ni Marilyn Moral, Officer-in-Charge ng Pag-abot Program, na alam ng kanilang mga social worker ang kaso ni Rose, kabilang ang kanyang pag-amin sa paggamit ng ipinagbabawal na gamot sa panayam ng “Pinoy Pawnstars” na hosted ni Boss Toyo.
“Alam po ng aming mga social worker ang tungkol sa paggamit paminsan-minsan ni Rose ng ilegal na substansiya. Kaya isa sa mga kondisyon ng aming tulong ay ang kanyang pagdaan sa rehabilitasyon,” saad ni Moral.
Dagdag pa ng opisyal, hindi isinasantabi ng DSWD ang mga katulad ni Rose na naninirahan sa kalsada. Sa halip, hangarin nilang tulungan itong makabalik at makapagbagong-buhay.
“Ang Pag-abot program ay hindi lamang basta nagbibigay ng ayuda, kundi nagsasagawa rin ng case management upang tiyaking may positibong pagbabago sa kanilang pamumuhay,” dagdag niya.
Sa panig ni DSWD Secretary Rex Gatchalian, ipinahayag niya ang buong suporta at kumpiyansa sa proseso ng pagbabago ni Rose.
“Naniniwala kami na may pag-asa si Rose. Sa tamang gabay, tulong, at pagkakataon, maaari siyang maging mabuting halimbawa ng pagbabago sa ating lipunan,” ani Gatchalian.
Ang viral na kwento ni Rose ay isa lamang sa napakaraming halimbawa ng realidad sa kalye — kung saan ang kahirapan, bisyo, at kawalan ng tulong ay nagiging siklo ng buhay. Ngunit sa tulong ng DSWD at ng Pag-abot Program, may bagong simula na naghihintay para sa kanya.
Bagamat marami ang kumuwestyon sa tulong na naibigay sa kanya, ang desisyon ng DSWD na ipa-rehab si Rose ay patunay na hindi sapat ang pansamantalang tulong kung walang tunay na pagbabago sa loob ng tao.
Sa dulo, ang mahalaga ay ang pagkakataong maibangon ang sarili — hindi dahil sa awa, kundi dahil sa pag-asang ang bawat isa ay may kakayahang magbago.
Walang komento:
Mag-post ng isang Komento