Nanawagan sina Miss Universe 2015 Pia Wurtzbach at singer-actor Ice Seguerra sa kabataang Pilipino, lalo na ang mga nasa edad 15 hanggang 25, na magpa-test para sa HIV kasabay ng ulat na patuloy na tumataas ang bilang ng kaso ng HIV sa bansa — umabot na sa higit 500% ang itinaas sa loob ng ilang taon ayon sa datos.
“Hindi nakakatakot ang katotohanan. Ang nakakatakot ay ang hindi ka kikilos para alagaan ang sarili mo. Kung may mahal ka sa buhay, magpa-test ka. Gawin mo ito para sa kanila, at para sa sarili mo.” - Pia Wurtzbach
Para kay Pia, matagal na niyang isinusulong ang HIV awareness simula pa sa kanyang pagsali sa Miss Universe. Aniya, hindi dapat puro takot at kaba ang umiiral, kundi kaalaman at pagkilos.
“Totoo, tumataas ang kaso ng HIV, lalo na sa kabataan. Nakakabahala ito, oo. Pero hindi ito katapusan ng kwento,” sabi ni Pia.
Dagdag pa niya, hindi dapat matalo ng takot ang kabataan. Sa halip, dapat ay magtulungan tayong labanan ito gamit ang pagmamahal, kaalaman, at aksyon.
“Let’s not let fear win. Let’s respond with love, knowledge, and action.”
Samantala, ibinahagi ni Ice Seguerra ang kanyang personal na karanasan bilang dating Chairperson ng National Youth Commission (NYC), kung saan nakita niya mismo ang matinding hamon sa pagsugpo ng HIV sa kabataan.
“Nung nasa NYC pa ako, ipinakita na sa amin ang nakakabahalang datos. Nakipagtulungan kami sa DOH at iba pang ahensya para itaas ang awareness at palaganapin ang testing,” ani Ice.
Ikinumpara ni Ice ang Pilipinas sa Thailand, kung saan ang maagang sex education, libreng condom distribution, at pagtanggal sa stigma ng HIV testing ay naging susi sa pagbaba ng kaso. Sa Pilipinas, aniya, napigilan ang mga programa dahil sa panggigipit ng ilang konserbatibong mambabatas.
“May mga mambabatas na gustong tapyasan ang budget namin kapag pinursige namin ang condom distribution. Gusto naming gumawa ng pagbabago pero tinalian kami ng pulitika,” dagdag niya.
Para kay Ice, kailangan ng mas malawak na pagtutulungan — mula sa pamahalaan, mga magulang, at komunidad.
“Sa mga magulang: kausapin ninyo ang mga anak ninyo tungkol sa sex. Tumulong kayong bigyan sila ng tamang kaalaman.
Sa mga lider: please do better. Hindi na ito panahon ng pagbubulag-bulagan.
HIV is not a death sentence, pero hindi rin ito dapat balewalain.”
Ang panawagan nina Pia Wurtzbach at Ice Seguerra ay hindi lamang para takutin ang kabataan, kundi para bigyan sila ng tapang at tamang impormasyon. Sa panahon ngayon kung saan mabilis kumalat ang impormasyon pero mabagal ang pagkilos, ang pinakaepektibong sandata ay kaalaman at malasakit.
Hindi kahihiyan ang magpa-test — ito ay responsableng hakbang para sa sarili, sa pamilya, at sa komunidad. At sa isang lipunang patuloy na lumalaban sa sakit at stigma, ang unang hakbang ay ang pagtanggap ng katotohanan.
Walang komento:
Mag-post ng isang Komento