Ipinahayag ni House Speaker Ferdinand Martin Romualdez ang buong suporta sa planong gawing ₱20 kada kilo ang presyo ng bigas, isa sa mga pangunahing pangako ni Pangulong Ferdinand Marcos Jr. noong kampanya. Sa isang pagpupulong kasama si Agriculture Secretary Francisco “Kiko” Tiu Laurel Jr. at iba pang opisyal, tiniyak ni Romualdez na kikilos ang Kongreso upang maisabatas ang mga panukala na magpapatatag sa presyo ng bigas at susuporta sa mga magsasaka.
“Hindi lang ito usapin ng murang bigas. Usapin ito ng dignidad, ng kaligtasan sa gutom, at ng kinabukasan ng bawat Pilipino. At handa tayong magpasa ng batas para siguruhing hindi lang ito pangako, kundi realidad.” - House Speaker Ferdinand Martin Romualdez
Ayon kay Romualdez, personal niyang isasalang at popondohan ang mga panukalang batas mula sa Department of Agriculture (DA) bilang bahagi ng adhikain para sa mas abot-kayang pagkain at mas maayos na kabuhayan ng mga Pilipinong magsasaka.
Ilan sa mga tinalakay na panukala ay ang pag-amyenda sa Rice Tariffication Law upang maibalik ang regulatory powers ng National Food Authority (NFA) at bagong batas para sa livestock, mais, sibuyas, at binhi sector.
“Hindi lang ito mga panukala — ito ay mga plano para sa pangmatagalang pagbabago,” pahayag ni Romualdez.
Gayunman, hanggang ngayon ay hindi pa rin nararamdaman ng karamihan ang ₱20/kilo na bigas, na limitado lamang sa ilang piling Kadiwa outlets na sinusuportahan ng gobyerno. Maraming eksperto at agricultural groups ang nagsasabing mahirap itong maabot kung walang malaking subsidiya at kung hindi aayusin ang mismong sistemang agrikultural.
Aminado si Romualdez na may hamon sa implementasyon, pero nananatili siyang positibo.
“Hindi ito madali, pero kung may maayos na batas at sapat na suporta sa mga magsasaka, posibleng maisakatuparan ito,” dagdag pa niya.
Ang pagtindig ni Speaker Romualdez para sa ₱20/kilo na bigas ay nagpapakita ng seryosong hangarin ng administrasyon na matupad ang matagal nang pangarap ng taumbayan — ang murang pagkain sa hapag. Ngunit hindi sapat ang batas kung hindi ito masusundan ng kongkretong aksyon sa produksyon, subsidiya, at suporta sa magsasaka. Sa huli, ang tagumpay ng planong ito ay hindi lang nakasalalay sa Kongreso kundi sa malawakang pagkilos ng buong gobyerno.
Walang komento:
Mag-post ng isang Komento