Sa isang emosyonal at matapat na panayam kay Boss Toyo sa programang Pinoy Pawnstars, si Rosemarie, ang babaeng sumikat online matapos makuhanan ng larawan habang lumalabas mula sa imburnal sa Makati City, ay nagbukas ng kanyang totoong kwento sa likod ng viral na litrato.
“Lahat tayo may pinagdaanan. Hindi ko ikinakahiya ang nakaraan ko kasi doon ako natuto. Ngayon, gusto ko lang mabuhay ng tahimik at marangal, para sa sarili ko at sa pamilya ko.” - Rosemarie
Ayon kay Rosemarie, ang kanyang pagpasok sa manhole ay hindi bunga ng kung anong delikadong gawain, kundi dahil lamang sa pagkuha ng kanyang cutter blade, na ginagamit niya sa pangongolekta ng mga plastik at kartong para ibenta.
“Nahulog po kasi yung panggupit ko, tapos ginamit ko pa naman yun para sa mga bote. Kaya pumasok ako. Di ko alam, may kukuha na pala ng litrato,” pahayag niya.
Ang nasabing cutter blade ay binili ni Boss Toyo ng ₱5,000, pero agad din niyang dinoble sa ₱10,000 at pinapirmahan kay Rosemarie para isama sa kanyang koleksyon ng mga makasaysayang bagay mula sa viral culture.
Sa gitna ng kanilang pag-uusap, aminado si Rosemarie na dati siyang nalulong sa bisyo pero agad niyang linawagan:
“Oo po, may bisyo ako noon… pero hindi naman ho araw-araw.”
Hindi rin niya ikinaila ang kanyang naging struggle sa mental health noong kabataan niya. Ipinakita pa niya ang mga peklat sa pulso na tanda ng kanyang dating pananakit sa sarili.
Ang asawa ni Rosemarie na nasa tabi niya noong panayam, ay nagsabi rin na tumigil na sila pareho sa bisyo, lalo na ngayong binabantayan sila ng Department of Social Welfare and Development (DSWD).
Bilang bahagi ng ayuda, nagbigay ang DSWD ng ₱80,000 sa mag-asawa para makapagsimula ng maliit na sari-sari store. Bukod pa rito, ikinukonsidera rin ngayon si Rosemarie bilang posibleng ambassador ng community rehabilitation program ng ahensya — isang malaking hakbang mula sa pagiging laman ng meme tungo sa pagiging simbolo ng pag-asa.
Ang kwento ni Rosemarie ay higit pa sa isang viral na litrato. Ito ay kwento ng pakikibaka, pagbagsak, at unti-unting pagbangon. Sa tulong ng mga taong handang makinig at maniwala, tulad ni Boss Toyo at ng DSWD, muling nabigyan ng pagkakataon si Rosemarie na buuin ang kanyang buhay — hindi na bilang “Imburnal Girl,” kundi bilang inspirasyon ng totoong pagbabago.
Walang komento:
Mag-post ng isang Komento