Matapos ang sunod-sunod na batikos mula sa publiko at mga environmental advocates, tuluyan nang inabandona ang Captain’s Peak Garden and Resort sa gitna ng Chocolate Hills sa Bohol. Isa itong dating resort na naging laman ng balita noong nakaraang taon matapos mabunyag na itinayo ito sa mismong gitna ng isang protected area—isang malinaw na paglabag sa regulasyon ng DENR at National Integrated Protected Areas System (NIPAS) Act.
“Hindi ko intensyon manira pero kailangan malaman ng tao ang totoo. Sayang ang lugar—maganda sana, pero mali talaga ang lokasyon. Ngayon, para na lang siyang multong iniwan sa gitna ng Chocolate Hills. Sana may matutunan tayo dito: hindi lahat ng negosyo, dapat itayo kung saan-saan.” - vlogger
Ayon sa isang viral na video ng isang vlogger na bumisita sa lugar kamakailan, halos wala na raw tao sa nasabing resort. Makikitang inaalikabok na ang mga estruktura, natutuyo na ang mga halaman sa paligid, at wala na ring staff o maintenance personnel na nag-aalaga sa dating pasyalan.
Noong unang kumalat sa social media ang larawan ng resort, umani ito ng matinding kritisismo dahil sa lokasyon nito sa gitna ng iconic na Chocolate Hills—isang natural wonder na bahagi ng UNESCO Global Geopark. Marami ang nagsabing sinira raw ng resort ang tanawin at mismong kalikasan ng lugar, bagay na itinatanggi naman noon ng may-ari.
Ngunit matapos ang imbestigasyon at mga panawagan ng publiko, pansamantalang ipinasara ito at kalauna’y tuluyang pinabayaan.
“Hindi ito dapat umabot sa ganito. Dapat sinigurado muna ng mga ahensya na may tamang permit at hindi makakasira sa kalikasan,” pahayag ng isang netizen.
Marami ang nalungkot ngunit sinabing nararapat lang ang naging kapalaran ng resort. “Tama lang yan. Kalikasan ang nawawala, hindi lang simpleng view,” dagdag pa ng isa.
“Dati po maraming bisita rito, lalo na ‘pag weekend. Pero simula noong mainit na ang isyu, unti-unting nabawasan. Hanggang sa tuluyan na ngang magsara at wala nang bumalik,” ayon kay Marco, isang dating utility staff ng resort.
Ang pag-abandona sa Captain’s Peak Garden and Resort ay nagsisilbing babala sa mga negosyanteng inuuna ang kita kaysa kalikasan. Hindi man mabilang ang ganda ng lugar noon, nanaig pa rin ang boses ng mamamayan na naninindigan para sa proteksyon ng mga likas na yaman. Ang Chocolate Hills ay hindi lang tanawin—ito ay bahagi ng ating kultura at kalikasan na dapat igalang at pangalagaan.
Walang komento:
Mag-post ng isang Komento