Isang nakakalungkot na trahedya ang yumanig sa Barangay Fatima, New Bataan, Davao de Oro matapos masawi ang isang 19-anyos na dalagita at magkasugat ang kanyang mga magulang dahil sa pag-atake ng libo-libong bubuyog habang sila ay naglilinis ng damo sa kanilang bukirin.
“Kung puwede lang sana na ako na lang ang kinuha, hindi ang anak ko. Napakabait niya… ang sakit makita siyang wala nang buhay sa braso ko. Hindi ko makakalimutan ‘yun habang buhay.” - Emmanuel Cañas
Kinilala ang biktima na si Monica Cañas, na noon ay kasama ang kanyang mga magulang nang biglang salakayin sila ng mga bubuyog.
Ayon sa ama ni Monica na si Emmanuel Cañas, siya ang unang tinadtad ng bubuyog. Habang pinapawi ang hapdi ng mga kagat, narinig niya ang sigaw ng kanyang asawa at anak. Sa kabila ng matinding sakit, dali-dali siyang tumakbo upang iligtas ang dalawa.
“Akala ko ako lang ang inatake. Bigla kong narinig sila. Nabitbit ko pa ang anak ko, pero ilang hakbang lang, bumagsak na siya malapit sa sapa,” kwento ni Emmanuel sa wikang Bisaya.
Dahil sa layo ng lugar mula sa sentro ng bayan, ilang oras pa ang lumipas bago sila narespondehan ng mga kapitbahay at nadala sa ospital. Sa kasamaang-palad, idineklarang dead on arrival si Monica.
Samantalang ang mga magulang nito ay matinding napinsala ng mga kagat sa mukha at katawan — halos hindi na makilala. Sila ngayon ay nasa ilalim ng mahigpit na medikal na obserbasyon.
Hindi pa tiyak kung bakit biglang umatake ang bubuyog, ngunit pinaniniwalaang may naistorbong pugad habang naglilinis sila ng damo sa lupaing taniman ng kanilang pamilya.
Ang biglaang trahedyang sinapit ng pamilya Cañas ay isang malupit na paalala kung gaano kapanganib ang kalikasan kapag ito’y biglang nagalit. Hindi sapat ang lakas o tapang ng tao kapag kaharap ang ganitong klase ng panganib. Habang patuloy ang imbestigasyon, marami ang nananawagan sa mas maingat na pangangalaga sa mga bukirin at kagubatan, pati na rin ang maayos na pagsuri bago magsagawa ng anomang gawain sa paligid ng mga pugad o tirahan ng insekto.
Walang komento:
Mag-post ng isang Komento