Nanawagan si House Speaker Ferdinand Martin Romualdez ng pagkakaisa, malasakit, at makataong pamumuno sa kanyang mensahe para sa pagdiriwang ng Eid al-Adha, isa sa pinakamahalagang selebrasyon ng mga kapatid nating Muslim.
“Ang tunay na lider ay hindi lang mahusay magsalita. Dapat ay marunong ding makinig, maglingkod, at magsakripisyo. Sa pagdiriwang ng Eid al-Adha, nawa’y mas lumalim ang ating pang-unawa sa kahalagahan ng pagkakaisa at pagmamalasakit sa kapwa.” -House Speaker Ferdinand Martin Romualdez
Sa kanyang mensahe nitong Biyernes, binigyang-diin ni Romualdez na ang okasyong ito ay hindi lamang selebrasyon ng pananampalataya, kundi paalala rin ng tunay na kahulugan ng sakripisyo, pananalig, at pagkakaisa — mga halagang hindi lamang pang-Islam, kundi pangkalahatang prinsipyo ng sangkatauhan.
“Ito ay mga prinsipyo na hindi lang umiikot sa Islam, kundi dama sa lahat ng pananampalataya. Ito ang mga halagang nagbibigkis sa atin bilang isang bayan, anuman ang ating pinaniniwalaan,” ani Romualdez.
Ang Eid al-Adha ay ginugunita ang pananampalataya ni Propeta Ibrahim (Abraham), na handang isakripisyo ang kanyang anak bilang pagsunod sa kalooban ng Diyos. Taun-taon, ito’y ipinagdiriwang sa pamamagitan ng panalangin, salu-salo, at pagbabahagi ng biyaya — lalo na sa mga nangangailangan.
Ayon kay Romualdez, ang tunay na sakripisyo ay nakaugat sa pagtitiwala at pagmamalasakit, bagay na dapat isabuhay ng mga nasa posisyon sa gobyerno.
“Paalala ito sa aming nasa pamahalaan na mamuno nang may dangal, manindigan para sa katarungan, at maglingkod ng tapat sa kapakanan ng mamamayan,” dagdag niya.
Pinagtibay rin ni Romualdez ang pangako ng Kongreso na ipagpatuloy ang pagsusulong ng mga batas na tumatanggap at nagpoprotekta sa relihiyosong kalayaan ng lahat.
“Nawa’y maging inspirasyon ang banal na araw na ito upang itaguyod natin ang isang bansang makatao at bukas para sa lahat.”
Ang mensahe ni Speaker Romualdez ngayong Eid al-Adha ay paalala sa lahat — opisyal man ng gobyerno o karaniwang mamamayan — na ang malasakit, pagkakaisa, at pananampalataya ang pundasyon ng isang maayos at makatarungang lipunan. Sa panahon kung saan madalas ay hinahati tayo ng opinyon at paniniwala, ang ganitong panawagan ay nagbibigay liwanag na sa kabila ng pagkakaiba-iba, kaya nating magsama-sama para sa mas mabuting Pilipinas.
Walang komento:
Mag-post ng isang Komento