Nagbabala ang mga malalaking grupo ng negosyante tungkol sa posibleng negatibong epekto ng ₱200 na dagdag-sahod sa arawang minimum wage na kamakailan ay inaprubahan ng House of Representatives. Ayon sa kanila, maaari itong magresulta sa mass layoff o pagtanggal sa trabaho, lalo na sa mga micro, small at medium enterprises (MSMEs) na siyang bumubuo sa malaking bahagi ng retail sector sa bansa.
"Hindi kami tutol sa dagdag sahod. Ang gusto lang namin, gawin ito sa tamang paraan at tamang proseso. Hindi pare-pareho ang kakayahan ng mga negosyo sa bawat rehiyon." -Roberto Claudio
Ayon kay Roberto Claudio, presidente ng Philippine Retailers Association (PRA), "Delikado ito lalo na sa mga maliliit na negosyo. Hindi nila kakayanin ang dagdag pasahod kaya baka mapilitan silang magbawas ng tao."
Tinukoy ng PRA na halos 70 porsyento ng mga manggagawa sa retail sector ay galing sa MSMEs, kaya't sila ang unang maaapektuhan kung tuluyang maisasabatas ang ₱200 wage hike.
Dagdag pa ni Claudio, magkakaroon ng 'salary distortion' sa loob ng kumpanya, dahil mapipilitan din silang itaas ang sahod ng mga empleyadong hindi minimum wage earners upang mapanatili ang balanse.
Dahil dito, suportado ng PRA at iba pang business groups ang panawagang ang mga Regional Wage Boards na lang ang dapat magtakda ng dagdag sahod base sa cost of living sa bawat rehiyon.
Philippine Chamber of Commerce and Industry (PCCI): Nangangamba na masisira ang mandato ng Regional Wage Boards at mas lalong mahihirapan ang mga maliliit na negosyo.
Employers Confederation of the Philippines at Philippine Exporters Confederation Inc.: Naniniwalang mas maraming negosyo ang magsasara o lilipat ng operasyon sa ibang bansa.
Makati Business Club (MBC): Giit nila, “Walang dahilan para balewalain ng Kongreso ang wage boards. Dapat ang tutukan ng gobyerno ay ang pagbaba ng presyo ng bilihin, lalo na ang pagkain.”
Tinukoy din ng MBC na ang ₱200 increase ay katumbas ng 31% na pagtaas sa Metro Manila at 37-44% sa Calabarzon, na anila’y sobrang bigat para sa karamihan ng mga employer.
Habang ang layunin ng dagdag-sahod ay makatulong sa mga manggagawang Pilipino, hindi maikakaila na maraming maliliit na negosyo ang nangangambang hindi makasabay sa biglaang pagtaas ng gastusin. Mahalaga ang balanse sa pagitan ng karapatan ng manggagawa sa makataong sahod at kakayahan ng negosyo na magpatuloy.
Sa huli, nasa Senado ang huling desisyon kung tuluyang maisasabatas ang ₱200 wage hike. Ngunit habang hinihintay ito, nananatiling mainit ang diskusyon sa pagitan ng mga manggagawa at mga negosyante.
Walang komento:
Mag-post ng isang Komento