Sa gitna ng media conference para sa nalalapit na “Idol Kids Philippines,” hindi napigilang ibahagi ni Juan Karlos “JK” Labajo ang kanyang saloobin sa mga batang sumasali sa singing contests para matulungan ang kanilang pamilya—kahit sila'y nasa murang edad pa lamang.
Ayon kay JK, masakit at nakakalungkot isipin na ang isang walong taong gulang ay kinakailangan nang magpursige para lang matulungan ang kanyang magulang. Para sa kanya, hindi dapat ganito ang realidad ng mga bata.
“Sobrang nakakalungkot para sa’kin kapag merong isang eight year old. ‘Ba’t ka sumali ng Idol Kids?’ ‘Para po matulungan ang magulang ko.’ Why? Let the kids be kids. The kids deserve to be children,” wika ni JK.
Ang mga katagang ito ay umani ng papuri mula sa netizens na pabor sa pagkakaroon ng mas masayang pagkabata ang mga bata. Isa rin siyang produkto ng kahirapan, kaya ramdam niya ang bigat ng responsibilidad na minsan ay pinapasan ng mga bata sa murang edad.
“Nakakalungkot lang na parang at eight years old, you’re already thinking about that? Won’t it be nice to just have fun? I get the hardships of life. I come from that,” dagdag niya.
Hindi rin nag-atubiling magbigay ng paalala sa mga magulang at mag-asawa: “Bago kayo mag-anak, mag-ipon muna kayo.”
Ayon kay JK, ang pagiging magulang ay hindi basta-basta. May kaakibat itong responsibilidad na dapat ihanda muna—lalo na sa aspeto ng pinansyal at emosyonal.
Ang pahayag ni JK Labajo ay tila sampal sa katotohanan ng maraming Pilipinong pamilya—kung saan ang kahirapan ay nagtutulak sa mga bata na gampanan ang papel ng matanda. Ngunit sa gitna ng lahat ng ito, isa ang malinaw: ang kabataan ay panahong hindi na dapat ipagkait. At kung may hangarin tayong maging responsableng lipunan, dapat ay simulan natin sa pagiging responsableng magulang.
“Let the kids be kids. The kids deserve to be children,” – Juan Karlos Labajo
Walang komento:
Mag-post ng isang Komento