Isang vlogger mula sa Davao City ang hinangaan ng marami matapos isoli ang isang bag na naglalaman ng ₱2.5 milyong piso na kanyang natagpuan sa isang mall restroom. Ngunit mas naging usap-usapan ang nangyari nang tumanggap lang siya ng ₱100 bilang pabuya.
"Alam ko pong maraming nadismaya sa halagang ibinigay sa akin, pero hindi po pera ang dahilan kung bakit ko isinoli. Ginawa ko lang po kung ano ang tama. Baka may mas higit pa sa gantimpalang iyon sa tamang panahon. Basta po, piliin nating maging mabuti kahit walang kapalit." - Rods Vlog
Siya ay si Rods Vlog, isang content creator na regular na nagbabahagi ng mga social experiments at kabutihang-loob online. Ayon sa kanya, hindi pera ang dahilan kung bakit niya ginawa ang tama.
“Maging positive mindset po tayo,” pahayag ni Rods, bilang tugon sa mga netizens na nakaramdam ng panghihinayang para sa kanya.
Sa kanyang viral Facebook video, ikinuwento ni Rods na habang nasa CR ng mall, napansin niya ang isang backpack na naiwan sa loob. Pagbukas niya nito, tumambad ang tambak-tambak na ₱1,000 bills. Sa halip na kuhanin o i-vlog para pagkakitaan, agad niya itong dinala sa customer service ng mall upang isoli.
Hindi nagtagal, nakarating sa may-ari ang bag, at personal itong nagtungo sa mall para kunin ang gamit. Lubos ang pasasalamat ng may-ari, at bilang pasasalamat ay nagbigay ito ng ₱100 — sapat umano para bumili ng malamig na inumin.
Ang kwento ni Rods Vlog ay isang paalala na sa kabila ng kahirapan o tukso, may mga Pilipinong pinipiling gumawa ng tama kahit walang kapalit. Hindi lahat ng kabutihan ay sinusuklian ng pera, at ang integridad ay isang gantimpala na hindi nasusukat ng halaga.
Sa panahon kung saan madalas na pinupuna ang kabutihan dahil sa kakulangan ng "reward," ang kilos ni Rods ay inspirasyon na ang tunay na bayani ay hindi naghihintay ng papuri o premyo.
Walang komento:
Mag-post ng isang Komento