Mariing tinuligsa ni Kabataan Party-list Representative Renee Co ang Department of Trade and Industry (DTI) matapos sabihin ng ahensya na P500 lamang ay sapat na para sa isang tipikal na pamilyang Pilipino upang makapaghanda ng Noche Buena ngayong Pasko. Ayon sa kongresista, hindi makatotohanan at malayo sa realidad ng ordinaryong mamamayan ang pahayag ng DTI, lalo na sa gitna ng patuloy na pagtaas ng presyo ng mga pangunahing bilihin.
“Huwag natin lokohin ang mga Pilipino na marangal ang paskong gipit.
Dapat ang mga korap ang magtiis sa P500 na Noche Buena hindi ang mga pamilyang araw-araw nagsusumikap para mabuhay” - Rep. Renee Co
Dagdag pa ni Co, tila malayo sa katotohanan ang mga opisyal ng DTI dahil hindi umano nila nararanasan ang hirap ng pagba-budget sa gitna ng krisis pang-ekonomiya. Ayon sa kanya, hindi maramdaman ng mga nasa posisyon ang tunay na halaga ng pera, kaya madali para sa kanila na maglabas ng ganitong mga pahayag.
Ang pahayag ni Rep. Renee Co ay sumasalamin sa hinanakit at realidad ng mga karaniwang Pilipino, lalo na ngayong patuloy na tumataas ang presyo ng mga bilihin. Habang sinisikap ng mga pamilya na magdiwang ng Pasko nang may pag-asa, tila lalong nawawala ang tiwala ng publiko sa mga ahensyang hindi ramdam ang tunay na kalagayan ng bayan.
Walang komento:
Mag-post ng isang Komento