Sa isang emosyonal at tapat na Instagram post, ibinahagi ng aktor at fitness enthusiast na si Carlos Agassi ang pinakamatinding laban ng kanyang buhay — hindi sa pelikula o sa gym, kundi laban sa matinding depresyon matapos ang seryosong injury sa basketball.
Tatlong taon na ang nakalilipas nang ma-injure si Carlos sa kanyang ACL, MCL, at meniscus. Ayon sa kanya, sinadya siyang sagasaan sa laro:
“ACL, MCL, meniscus injury ako dahil sinahod ako sa basketball. Hindi man lang nag-sorry. Galit na galit si misis, gusto upakan! Sabi ko, ‘Wag na Love, bahala na si Lord.’”
Matapos ang operasyon, hindi naging madali ang recovery ni Carlos. Naranasan niya ang mga komplikasyon — hindi siya makalakad, makatayo, o makapunta ng banyo mag-isa. Unti-unti siyang binalot ng matinding kalungkutan at depresyon.
“Sobrang depressing, ilang linggo akong umiiyak at gusto ko nang mawala sa mundo,” pag-amin ni Carlos.
Hindi raw niya inasahan na darating siya sa punto ng buhay na magiging sobrang dependent siya sa iba. Ngunit sa kabila ng lahat, isa lang ang hindi bumitaw — ang kanyang asawa, si Sarina Agassi.
Ayon kay Carlos, si Sarina ang nagsilbing ilaw, lakas, at sandalan niya sa gitna ng kadiliman.
“Swerte ko sa misis ko, hulog ng langit at maraming salamat sa Diyos,” aniya.
Tinulungan siya ni Sarina sa lahat — mula sa simpleng pag-abot ng weights habang siya’y naka-crutches, hanggang sa pagbibigay ng emosyonal na suporta sa mga panahong gusto na niyang sumuko.
“Si Mrs tiga-abot ng mabibigat na weights. Hindi ako pinabayaan,” dagdag pa niya.
Sa panahon ngayon kung saan karamihan ay pinapakita lang ang magaganda sa social media, napaka-refreshing ng katapatan ni Carlos Agassi. Ang kanyang kwento ay paalala sa lahat na ang tunay na lakas ay hindi lamang sa katawan, kundi sa suporta ng mga mahal natin sa buhay.
Hindi kahinaan ang umiyak o madapa — lalo na kung may taong handang bumuhat sa’yo pauwi.
Walang komento:
Mag-post ng isang Komento