Ipinapakita ni dating Pangulong Rodrigo Duterte na handa siyang harapin ang kaso laban sa kanya sa International Criminal Court (ICC) matapos siyang maghain ng pormal na kahilingan para sa pansamantalang paglaya habang hinihintay ang paglilitis.
“Mr. Duterte is not a flight risk, and custody is not necessary to ensure his appearance before the Court. He must, as a result, be immediately released from ICC custody.” -Atty. Kaufman
Ayon sa kanyang abogado na si Atty. Nicholas Kaufman, inilahad sa 16-pahinang dokumento ang mga dahilan kung bakit karapat-dapat si Duterte na makalaya pansamantala, kabilang ang kanyang kooperasyon sa legal na proseso at kawalan ng panganib ng pagtakas.
Bukod dito, isang banyagang bansa raw ang naghayag ng kagustuhan na pansamantalang tumanggap kay Duterte sa kanilang teritoryo, bagama’t hindi ibinunyag ang pangalan ng nasabing bansa para sa seguridad.
“Ang Redacted ay nagpahayag ng malinaw na kagustuhang makipagtulungan sa hukuman, at tanggapin si G. Duterte sa kanilang teritoryo,” saad ng dokumento.
Hindi ikinatuwa ng ilang tagasuporta ng karapatang pantao ang hakbang na ito. Ayon kay Atty. Kristina Conti, isang human rights lawyer:
“Para akong binuhusan ng malamig na tubig. Nakakabahala kung walang pagtutol mula sa ICC prosecutor.”
Ipinaliwanag din niya na maaring magdulot ito ng pangamba sa mga pamilya ng mga biktima ng war on drugs, lalo’t tila may posibilidad na hindi agad makulong ang dating pangulo.
Si Duterte ay nakadetine sa The Hague simula pa noong Marso 12, dahil sa mga kasong crimes against humanity kaugnay ng kanyang madugong kampanya kontra droga sa Pilipinas noong kanyang panunungkulan.
Sinasabing hindi na siya isang banta sa imbestigasyon at wala namang dahilan para huwag siyang palayain pansamantala — lalo’t may bansa nang bukas sa pagtanggap sa kanya habang inaantay ang paglilitis.
Ang kahilingan ni Duterte na makalaya pansamantala mula sa ICC ay nag-iiwan ng maraming tanong sa publiko — mula sa kalagayan ng mga biktima ng war on drugs, hanggang sa tunay na intensyon ng kanyang pag-alis ng Hague. Bagama’t sinasabing legal ang proseso, hindi maiiwasang magduda ang ilan sa epekto nito sa hustisya.
Habang wala pang desisyon ang ICC Pre-Trial Chamber I, mananatiling nakaabang ang buong mundo kung haharap ba talaga si Duterte sa korte — o tuluyang maglalakad sa malayang lupa ng ibang bansa.
Walang komento:
Mag-post ng isang Komento