Pinuri ni Senadora Grace Poe si Pangulong Ferdinand “Bongbong” Marcos Jr. sa naging desisyon nitong ipagpaliban ang rehabilitasyon ng EDSA, na orihinal sanang sisimulan sa Hunyo 13 ngayong taon at tatagal hanggang 2027.
Ayon kay Poe, ang desisyong ito ay isang palatandaan ng pagiging bukas sa katuwiran at malasakit sa publiko, lalo na sa araw-araw na dinaranas ng mga motorista at mananakay sa EDSA.
“Ang proyekto ay para sa ikabubuti ng nakararami, pero dapat itong isagawa nang may pag-iingat, may plano, at may malasakit. Kung kailangang maghintay ng isang buwan para mas mapaganda ito, diyan tayo dapat pumabor.”
“Kung itinuloy ito nang walang sapat na paghahanda, tiyak na kaguluhan ang aabutin natin sa trapiko. Magiging dagdag pasakit pa ito sa mamamayan,” ani Poe.
Ang 23.8-kilometrong EDSA Rehabilitation Project ay nakatakda sanang simulan ngayong Hunyo at gagawin sa loob ng tatlong taon. Subalit inihayag ng pangulo sa isang video message sa Super Radyo dzBB na ito ay ipagpapaliban muna ng isang buwan upang muling pag-aralan gamit ang mga makabagong teknolohiya na maaaring magpabilis ng trabaho at magpababa ng abala.
“Ang pagpapaliban na ito ay hindi dapat masayang. Gamitin natin ang panahon para gumawa ng mas detalyado at episyenteng plano,” dagdag pa ng senadora.
Ang desisyon ni Pangulong Marcos na ipagpaliban ang EDSA rehab ay nagpapakita ng pagkilala sa tunay na kalagayan ng mga Pilipino sa kalsada. Ayon kay Senadora Poe, ito ay isang pagkakataon upang mas mapaghandaan ang proyekto sa halip na magmadali at magdulot ng dagdag pasakit sa publiko.
Walang komento:
Mag-post ng isang Komento