8 PULIS SA METRO MANILA SINUSPINDE DAHIL SA PAGPALYA SA 5-MINUTE RESPONSE RULE NG BAGONG PNP CHIEF

 

Walo sa mga hepe ng pulisya mula sa iba’t ibang lungsod ng Metro Manila ang sinuspinde mula sa kanilang mga posisyon matapos hindi makasunod sa bagong 5-minute response policy na ipinatutupad ni bagong Philippine National Police (PNP) Chief Gen. Nicolas Torre III.

Sa isang panayam kasunod ng flag-raising ceremony sa Quezon City Hall, kinumpirma ni Torre:

“We’ve already relieved eight,” aniya.

Ang mga sinuspindeng opisyal ay mula sa mga lungsod ng Caloocan, Navotas, Valenzuela, Mandaluyong, Marikina, San Juan, Parañaque, at Makati.

Ayon kay Torre, hindi ito titigil sa walo. Binanggit niya na nagbigay na rin siya ng babala sa mga provincial commanders sa Iloilo noong Hunyo 15, bilang bahagi ng kanyang pag-iikot upang suriin ang pagpapatupad ng “Serve and Protect” na polisiya ng PNP.

Dagdag pa ni Torre:

“We will declare those positions open para mabigyan ng pagkakataon ang ibang kwalipikado at handang umaksyon agad,” paliwanag niya.

Ano ba ang 5-minute response rule?

Ito ay isang polisiya kung saan inaasahan ang agarang pagresponde ng pulisya sa loob ng limang minuto, anuman ang oras ng araw. Ang sistemang ito ay malayo sa nakasanayang precinct-based policing, at nilalayong maiparamdam ang presensya ng kapulisan agad sa mga emerhensya.

“Gusto ko aktibo ang mga commander. Hindi lang sila basta nauupo. Dapat nagbibigay ng utos gamit ang radyo o anumang communication tool,” diin ni Torre.

Ang patakarang ito ay una nang ipinatupad ni Torre sa Quezon City Police District at ngayon ay nationwide na ang implementasyon.

Ang hakbang ni Gen. Nicolas Torre ay malinaw na mensahe sa buong hanay ng kapulisan: walang puwang para sa mabagal na serbisyo sa panahon ng pangangailangan. Sa kanyang liderato, mas magiging mahigpit ang pamantayan at mas binibigyang halaga ang tunay na aksyon kaysa sa titulo o posisyon.

Kung ang lahat ng hepe ay susunod sa ganitong disiplina, malaki ang posibilidad na muling lumakas ang tiwala ng taumbayan sa kapulisan. Ang layunin ay simple serbisyong mabilis, maaasahan, at makatao.