Opisyal nang may bagong Administrator ang Overseas Workers Welfare Administration (OWWA), matapos ianunsyo ng Presidential Communications Office (PCO) nitong Biyernes na si Department of Migrant Workers (DMW) Undersecretary Yvonne Caunan ang papalit kay Arnell Ignacio bilang pinuno ng ahensya.
"Kung ito ang desisyon ng Palasyo, wala akong sama ng loob. Sa lahat ng OFWs at OWWA employees na naging parte ng aking panunungkulan, maraming salamat. Naglingkod ako nang buong puso, at mananatili akong tagasuporta ng mga OFW saan man ako dalhin," ani Ignacio sa kanyang pahayag.
Samantala, mainit na tinanggap ng DMW at ilang opisyal si Undersecretary Caunan bilang bagong lider ng OWWA.
Si Ignacio ay naupong OWWA chief noong 2022, at naging aktibo sa mga programa para sa kapakanan ng Overseas Filipino Workers (OFWs). Ngunit bigla na lamang siyang pinalitan nang walang malinaw na dahilan mula sa Malacañang.
Hindi nagbigay ng eksaktong dahilan ang Malacañang kung bakit pinalitan si Arnell Ignacio. Subalit maraming netizens at political observers ang naghinala na posibleng may kaugnayan ito sa pagiging kilalang tagasuporta niya ng dating Pangulong Rodrigo Duterte.
Bagama’t walang kumpirmasyon mula sa gobyerno, kapansin-pansin ang timing ng kanyang pagkakatanggal, lalo pa’t si Ignacio ay naging aktibong tagapagtanggol ng Duterte administration sa mga isyung may kinalaman sa migrante at social media affairs.
Ang biglaang pagpapalit kay Arnell Ignacio bilang OWWA Administrator ay nagbukas ng maraming tanong, lalo na’t hindi malinaw ang dahilan sa likod nito. Bagama’t iginiit niyang wala siyang hinanakit at tanggap ang desisyon, hindi maiiwasang umalingawngaw ang isyu ng pulitika at loyalty sa mga desisyong may kinalaman sa mga posisyon sa gobyerno.
Walang komento:
Mag-post ng isang Komento