Kumpirmado mula sa Akbayan Party President Rafaela David na pinayagan na ang kanilang panawagan na isama sa November 30 rally ang demanda para sa pagbibitiw ni Vice President Sara Duterte.
Ayon kay David, mahalagang ipahayag ng mga mamamayan ang kanilang saloobin laban sa mga opisyal ng gobyerno na sangkot sa isyu ng korapsyon, maling paggamit ng pondo, at abuso sa kapangyarihan.
“Naniniwala po tayo na dapat panagutin si Sara. In fact, nag-endorse na tayo ng impeachment laban sa kanya” - Rafaela David
Binigyang-diin ni David na kabilang sa mga dahilan ng kanilang panawagan ay ang kontrobersyal na paggamit umano ng ₱125 milyon confidential at intelligence funds ng Office of the Vice President (OVP) noong 2022. Ayon sa kanya, habang patuloy na lumalala ang kahirapan at kakulangan ng pondo sa mga sektor tulad ng edukasyon at kalusugan, nakakabahala na ginamit ang ganitong halaga sa mga pondo na hindi malinaw ang detalye ng paggamit.
Inimbitahan din ni David ang mga Pilipino, lalo na ang mga kabataan at manggagawa, na makilahok sa mapayapang pagkilos sa Nobyembre 30, kasabay ng paggunita sa Bonifacio Day.
Sa panibagong yugto ng pampulitikang tensyon, pinatunayan ng Akbayan Party na handa silang manindigan laban sa mga opisyal ng gobyerno na sangkot sa anomalya, anuman ang posisyon o kapangyarihan ng mga ito.
Ang panawagan para sa pagbitiw ni Vice President Sara Duterte ay nagsisilbing paalala na ang tiwala ng bayan ay kailangang pinangangalagaan, hindi inaabuso.
Walang komento:
Mag-post ng isang Komento