Hindi na napigilan ni Asia’s Songbird Regine Velasquez ang kanyang damdamin at pag-asa para sa bayan matapos niyang muling ipanawagan sa administrasyong Marcos ang mas mabilis na pagpapanagot at pagkakakulong ng mga tiwaling opisyal ng gobyerno. Sa edad na 55, emosyonal niyang sinabi na ang tanging hiling niya ay makita ang Pilipinas na malinis at walang katiwalian bago siya tuluyang pumanaw.
“Bakit hanggang ngayon parang wala pa ring napaparusahan? Ilang taon na tayong naghihintay pero paulit-ulit na lang ang kwento. Sana sa ilalim ng administrasyong ito, makita naman namin na may nakulong kahit isa man lang — para sa mga ninakaw nila sa taumbayan.” -Regine
Sa isang matapat na pahayag, ibinahagi ni Regine ang kanyang pagod, pagkadismaya, ngunit matinding pag-asa sa laban kontra korapsyon: “I’m 55, konting panahon na lang ang ilalagi namin sa mundo. Sana man lang maabutan namin ang isang maluwalhating pamumuhay para sa mga Pilipino,” saad ng OPM icon.
Hindi ito simpleng hinaing ng isang mamamayan ito ay sigaw ng isang Pilipinong taxpayer na taon-taong nagbibigay ng buwis ngunit patuloy na nakikita ang mga magnanakaw sa gobyerno na malaya at hindi napapanagot. Dagdag pa niya, panahon na para ang mga nasa kapangyarihan ay ipakita sa taumbayan ang tunay na hustisya at hindi lang puro pangako.
Para sa kanya, ang kawalan ng hustisya ay isang sugat sa bawat Pilipinong nagsusumikap, nagbabayad ng buwis, at umaasa sa serbisyo ng gobyerno. Kung may isang bagay na gusto niyang makita sa nalalabing panahon ng kanyang buhay, iyon ay isang gobyernong may pananagutan.
Ang panawagan ni Regine Velasquez ay hindi lamang isang hinaing kundi isang malakas na boses ng sambayanan. Isa siyang simbolo ng mga Pilipinong nagbabayad ng buwis, nagtatrabaho nang tapat, at naghahangad lamang ng gobyernong patas at makatarungan.
Walang komento:
Mag-post ng isang Komento