Posibleng muling mabuhay ang impeachment case laban kay Vice President Sara Duterte kung babaligtarin ng Korte Suprema ang nauna nitong desisyon na nagsasabing unconstitutional ang mga artikulo ng impeachment na ipinasa ng Kamara patungo sa Senado.
"Hindi ako nag-abstain para maglaro ng ligtas. Ginawa ko iyon bilang respeto sa proseso at sa Korte Suprema. Kung may pagbabago sa desisyon, handa akong ipaglaban na talakayin muli ito." -Sen. Ping Lacson
Sa isang panayam sa dzBB, sinabi ni Senador Panfilo “Ping” Lacson na handa siyang, kasama si Senador Vicente “Tito” Sotto III, maghain ng mosyon para bawiin ito mula sa archive at muling talakayin sa Senado.
“Hypothetically, kung babaligtarin ng SC ang desisyon, ako at si Senator Sotto ay gagalaw para hilahin ito mula sa archive at pag-usapan. Kung may tututol at matalo kami sa botohan, ipapaalala ko sa kanila kung ano ang sinabi nila noong i-archive ang kaso,” ayon kay Lacson.
Noong Agosto 6, sa botong 19 pabor, 4 laban, at 1 abstain (mula kay Lacson), nagpasya ang Senado na i-archive ang impeachment case matapos ideklara ng Korte Suprema na labag sa Konstitusyon ang pagkakasampa nito.
Pinaliwanag ni Lacson na ang kanyang abstention ay hindi para “mag-play safe” kundi dahil nirerespeto niya ang proseso ng Korte Suprema, lalo na’t may nakabinbing motion for reconsideration mula sa Kamara na isinampa sa pamamagitan ng Solicitor General. Pinunto rin niya na imbes na agad itong ibasura, inutusan pa ng Korte Suprema si VP Sara na magkomento sa nasabing motion.
Dagdag pa ni Lacson, kung sakaling bawiin ng SC ang desisyon at hindi igalang ng Senado ang final ruling, ipapaalala niya sa mga kapwa senador ang kanilang dating dahilan—na igalang ang desisyon ng mataas na hukuman.
Aniya, sa huli ay majority vote pa rin ang masusunod, dahil ito ang diwa ng demokrasya.
Nananatiling mainit ang isyu sa politika, lalo na’t bukas ang pinto para sa muling pagbabalik ng impeachment case laban kay VP Sara Duterte. Ang magiging desisyon ng Korte Suprema sa motion for reconsideration ang magsisilbing susi kung mananatili itong sarado o bubuksang muli sa Senado.
Walang komento:
Mag-post ng isang Komento