Sa pagpasok ng tag-ulan, agad na kumilos ang Department of Social Welfare and Development (DSWD) upang tiyaking may sapat na tulong para sa mga Pilipinong maaring maapektuhan ng mga bagyo at pagbaha. Ayon kay DSWD Secretary Rex Gatchalian, nasa 3 milyong family food packs (FFPs) na ang naka-preposition o naka-imbak sa 938 na bodega sa buong bansa bilang bahagi ng programa nilang “Buong Bansa Handa” o BBH.
Ang inisyatibong ito ay bahagi ng direktiba ni Pangulong Ferdinand Marcos Jr. na bigyang-priyoridad ang kaligtasan at kapakanan ng mamamayan, lalo na yaong nakatira sa mga lugar na madalas tamaan ng kalamidad.
“Inutusan tayo ng Pangulo na tiyaking may kapanatagan ang loob ng mga Pilipino tuwing may kalamidad. Kaya pinalakas natin ang ‘Buong Bansa Handa’ para mapabilis ang pag-abot ng tulong,” ani Gatchalian.
Ang BBH ay isang whole-of-government at whole-of-nation approach, kung saan nagsasanib-puwersa ang gobyerno at pribadong sektor upang magbigay ng mabilis at epektibong tulong sa mga apektadong komunidad.
Kasabay ng pag-anunsyo ng Philippine Atmospheric, Geophysical and Astronomical Services Administration (PAGASA) ng low-pressure area (LPA) sa silangan ng Eastern Visayas, nagbabala rin ang ahensya na ito ay maaaring magpalakas sa habagat, na magdadala ng malalakas na pag-ulan sa Metro Manila, Calabarzon, Mimaropa, Zamboanga Peninsula, BARMM, Soccsksargen at ilang bahagi ng Visayas.
Bagamat maliit ang tiyansang maging bagyo ang nasabing LPA, maaari pa rin itong magdulot ng baha at pagguho ng lupa.
Hinimok ng DSWD ang lahat na manatiling alerto at sumunod sa mga abiso ng kani-kanilang local government units (LGUs) at mga ahensiyang namamahala sa disaster response.
“Hindi natin kayang pigilan ang bagyo, pero kaya nating paghandaan. Nasa mga bodega na ang food packs, nakaantabay ang mga tauhan, at aktibo ang koordinasyon sa mga LGU. Ang mahalaga ngayon ay makinig tayo sa babala at mag-ingat,” dagdag ni Gatchalian.
Ang maagap na aksyon ng DSWD sa gitna ng banta ng masamang panahon ay hindi lamang nagpapakita ng kahandaan kundi ng tunay na malasakit sa kapakanan ng bawat Pilipino. Sa halip na hintayin ang sakuna bago kumilos, mas pinili ng ahensya na maagap na maglatag ng solusyon.
Ang tag-ulan ay panahon ng panganib, pero sa tulong ng koordinado at konkretong hakbang ng gobyerno, may pag-asa tayong lahat na masalubong ito nang may kumpiyansa at kapanatagan.
“Hindi natin kailangan matakot kung may tamang paghahanda. Sa tulong ng ‘Buong Bansa Handa,’ hindi natin iiwan ang kahit sinong Pilipino,” pagtatapos ni Sec. Rex Gatchalian.
Walang komento:
Mag-post ng isang Komento