Sa kabila ng pagkatalo sa senatorial race, nagpakumbaba at buong puso pa ring nagpasalamat si Willie Revillame sa mga taong sumuporta sa kanya. Sa unofficial results ng 2025 national elections, nagtapos si Revillame sa 22nd place na may 8,414,610 boto, kulang para makapasok sa top 12 na mananalo sa Senado.
Sa isang maikling pahayag, inamin ni Revillame ang kanyang pagkadismaya ngunit tinanggap niya ang resulta nang may pagpakumbaba at walang hinanakit.
“Sabi nga nila, wala daw akong alam. Tama sila,” ani Willie sa isang panayam.
“Pero kahit gano’n, ang puso ko ay laging nasa pagtulong. At kahit natalo ako, tuloy pa rin ang serbisyo sa mga nangangailangan.”
Aminado si Kuya Wil na nanghihinayang siya sa resulta, lalo na’t umaasa siyang magagamit niya ang puwesto sa Senado upang mas mapalawak pa ang kanyang tulong sa mahihirap. Ngunit para sa kanya, hindi puwesto ang sukatan ng paglilingkod.
“Masakit kasi gusto ko sanang tumulong sa mas malaking paraan. Pero hindi ako galit, hindi ako nagtatanim ng sama ng loob. Natutuwa pa rin ako dahil milyon pa rin ang sumuporta sa akin.”
Pinangako ni Willie na hindi magbabago ang kanyang layunin—ang tumulong sa kapwa. Wala man sa Senado, tuloy pa rin daw ang kanyang mga proyekto para sa mga mahihirap.
“Hindi man ako nanalo, hindi ako titigil. Nandito pa rin ako para sa inyo. Tuloy pa rin ang Wowowin, tuloy pa rin ang pagtulong. Hindi ko kayo iiwan,” saad niya.
Ang pagkatalo ni Willie Revillame sa senatorial race ay hindi naging dahilan para siya'y tumigil sa kanyang adbokasiya. Sa halip, ipinakita niyang ang tunay na paglilingkod ay hindi kailangang may puwesto sa gobyerno—kundi may puso, malasakit, at pang-unawa sa mga nangangailangan.
Sa kanyang pag-amin, “Sabi nga nila wala akong alam. Tama sila,” mas nakita ng tao ang kanyang kababaang-loob—isang bagay na bihira sa pulitika ngayon. At sa kanyang pangakong “Hindi ko kayo iiwan,” malinaw na ang laban ni Kuya Wil ay para sa masa, hindi lang sa Senado.
Walang komento:
Mag-post ng isang Komento