Gulantang at lungkot ang bumungad sa mga miyembro ng San Vicente Ferrer Chapel sa Barangay Colonia, Valencia City, Bukidnon nang madiskubre nila ang karumal-dumal na sinapit ng limang sagradong imahen.
"Hindi lang po mga rebulto ang nawala, parang may piraso rin ng pananampalataya namin na ninakaw. Sana po ay managot ang may gawa nito. Hindi po ito biro." - miyembro ng simbahan
Habang papasok para sa kanilang umagang panalangin, nakita ng mga mananampalataya ang mga imahe ng santo na pinugutan ng ulo at iniwang nakatiwangwang sa harap ng kapilya. Hanggang ngayon, hindi pa rin natatagpuan ang mga ulo ng mga imahen.
Ayon sa mga lider ng simbahan, hindi lang ito simpleng paninira ng gamit kundi isang malalim na pambabastos sa pananampalataya ng buong komunidad.
"Napakasakit po sa amin. Hindi lang ito imahen. Bahagi ito ng panalangin at pananampalataya ng bawat isa sa aming barangay," pahayag ni Mang Isko, isa sa mga aktibong miyembro ng chapel.
Kaagad namang ini-report sa mga awtoridad ang insidente at kasalukuyang isinasagawa ang imbestigasyon upang matukoy ang mga salarin sa likod ng paninira.
Ayon sa pulisya, wala pang tiyak na motibo kung bakit sinira ang mga imahe, ngunit pinag-aaralan ang posibilidad ng personal na galit, antisimbahan na paniniwala, o simpleng gawa ng kabaliwan.
Habang patuloy ang imbestigasyon, nananawagan ng tulong ang simbahan at lokal na pamahalaan sa sinumang may impormasyon ukol sa insidente.
Hindi simpleng paninira ng gamit ang naganap sa San Vicente Ferrer Chapel. Isa itong pagyurak sa paniniwala ng isang komunidad na ang tanging layunin ay manalangin at mamuhay ng tahimik. Sa panahong laganap ang kaguluhan at panlalamig ng puso, sana'y manumbalik ang respeto sa pananampalataya ng bawat isa. Hangad ng buong Valencia City ang hustisya, kapayapaan, at panunumbalik ng dignidad sa dambana ng pananampalataya.
Walang komento:
Mag-post ng isang Komento