Isang simpleng tanong ng isang bata ang muling nagpaalab ng dedikasyon ni Teacher Delfin Angeles, dating guro ng Philippine Science High School, na ngayon ay balik serbisyo sa pamamagitan ng isang libreng paaralan sa kanilang barangay.
“Hindi lahat ng bayani may espada. Minsan, lapis lang ang hawak at puso ang puhunan. Basta may batang gustong matuto, may dahilan akong ituloy ito.” -Teacher Delfin Angeles
Ngayong taon, sa halip na tahimik na pamumuhay bilang retiradong guro, itinayo niya ang tinatawag niyang “Eskwelahang Munti” — isang maliit ngunit makabuluhang inisyatiba kung saan libreng tinuturuan ang mga batang walang kakayahang pumasok sa formal na paaralan.
Ayon kay Teacher Delfin, nagtuturo siya ng Matematika, Ingles, Agham, at mabuting asal, gamit lang ang mga lumang lapis, bolpen, karton, at sariling sipag. Ang klasrum nila? Isang simpleng espasyo sa lansangan ng kanilang barangay sa Mayapa.
“Mula noon, hindi na ako ‘Lolo’. ‘Teacher’ na ang tawag nila sa akin. Doon ko na-realize, hindi pala natatapos ang pagiging guro sa pagretiro,” ani ni Teacher Delfin sa kanyang viral Facebook post.
Taong 1975 pa nagsimulang magturo si Teacher Delfin sa Mayapa Elementary School. Matapos ang dekada ng serbisyo sa edukasyon, pansamantalang namaalam sa pagtuturo. Pero ngayong 2025, isang munting hiling ng isang bata — “Teacher, turuan mo po ako” — ang muling bumuhay sa kanyang misyon.
Upang masuportahan ang kanyang mga estudyante, namumulot at nangangalap siya ng lumang gamit mula sa mga kaibigan at kapitbahay. Maging ang mga karton ay ginagawang clipboard.
Araw-araw, kahit walang classroom o sweldo, patuloy ang pagtuturo. Hindi alintana ang init ng araw, ingay ng lansangan, o pagod sa katawan.
Ang kwento ni Teacher Delfin Angeles ay patunay na hindi nasusukat sa laki ng paaralan o dami ng kagamitan ang tunay na edukasyon. Minsan, sapat na ang puso, malasakit, at simpleng hangarin — ang matulungan ang mga batang may pangarap.
Sa kanyang Eskwelahang Munti, tumutubo ang malalaking pangarap sa maliit na espasyo, at naipapasa ang tunay na halaga ng serbisyo: ang pagtuturo mula sa puso.
Sa panahong maraming hadlang sa edukasyon, naging liwanag si Teacher Delfin sa kanyang barangay — at inspirasyon sa buong bayan.
Walang komento:
Mag-post ng isang Komento