Mainit na usapin pa rin ang road rage incident na kinasangkutan ng motovlogger na si Alyanna Mari Aguinaldo, mas kilala sa social media bilang Yanna Motovlog. Nitong Mayo 8, pormal nang isinuko ni Yanna ang kanyang driver's license sa Land Transportation Office (LTO) matapos ipataw ang 90-araw na preventive suspension laban sa kanya.
“Dapat magsilbing babala ito sa lahat ng motorista na ang pambabastos at pagiging iresponsable sa kalsada ay hindi palalagpasin. May batas na dapat sundin at kami sa LTO ay seryoso sa pagpapatupad nito,” ayon kay LTO Chief Vigor Mendoza II.
Ang kanyang lisensya ay isinumite kay Renante Melitante, pinuno ng Intelligence and Investigation Division ng LTO. Ayon sa ahensya, ito ay bahagi ng mahigpit na hakbang upang mapanagot ang mga driver na may asal na delikado sa lansangan.
Ngunit isang malaking tanong ang naiwan: nasaan ang motorsiklong ginamit sa insidente?
Sa pamamagitan ng kanyang abogado, sinabi ni Yanna na hindi niya pagmamay-ari ang motor at ito raw ay galing sa isang kaibigan. Kinumpirma naman ito ng LTO sa kanilang imbestigasyon, na ang motorsiklo ay hindi nakarehistro sa kanyang pangalan.
Dahil dito, ipapatawag ng LTO ang rehistradong may-ari ng motor sa susunod na pagdinig upang iharap ang sasakyan para sa inspeksyon at pag-verify.
Sa kabila ng paghingi ng tawad at mga paliwanag ni Yanna, malinaw na seryoso ang LTO sa pagsugpo sa mga insidente ng road rage at reckless driving. Ang suspensyon ng lisensya niya ay patunay na hindi pwedeng balewalain ang batas—lalo na kung ito ay may epekto sa kaligtasan ng publiko.
Patuloy na iniimbestigahan kung tuluyang kakanselahin ang kanyang lisensya, habang inaasahan ang susunod na hakbang ng LTO tungkol sa motorsiklong hindi pa rin naipapakita.
Walang komento:
Mag-post ng isang Komento