Pinatunayan ng isang college student mula sa Maynila na hindi hadlang ang maliit na kita para maabot ang pangarap.
Si Carlo Ramirez, 21 anyos, mula sa Tondo, Maynila, ay mas piniling ipunin ang bawat padala ng kanyang inang OFW sa tig-₱20 na bill sa loob ng isang malaking drum. Sa ganitong paraan niya pinapahalagahan ang sakripisyo ng kanyang ina na nagtatrabaho sa Qatar bilang domestic helper.
“Hindi po madaling mawalay sa magulang. Kaya bawat padala ni Mama, iniipon ko. Hindi po siya nag-aabroad para lang masayang ‘yung pinaghihirapan niya. Para po ito sa kanya at sa aming pamilya.” -Carlo Ramirez
“Bawat perang pinapadala ni Mama, galing sa pagod at luha. Kaya sinisigurado ko, hindi masasayang,” sabi ni Carlo.
Noong nakaraang taon, isang matinding pagsubok ang dumaan sa kanilang pamilya nang masunog ang kanilang tirahan sa Maynila. Nawalan sila ng gamit, pero hindi ng pag-asa.
Sa kabila ng pangyayari, mas lalo raw naging determinado si Carlo na makatapos ng pag-aaral. Lahat ng iniipon niya mula sa tig-₱20 ay kanyang ginamit pambayad sa tuition fee sa kolehiyo.
Ayon sa kanyang ina, tatlong beses na raw napuno ni Carlo ang drum ng tig-₱20 bills, na umabot sa kabuuang halagang ₱45,000.
“Hindi ko in-expect na aabot siya sa ganun kalaki. Tatlong drum ng tig-bente? Napaka-proud ko sa anak ko. Hindi lahat ng kabataan may disiplina at malasakit na ganun.” -Pahayag ng Ina ni Carlo
Ang kwento ni Carlo Ramirez ay isang makabagbag-damdaming paalala na ang tunay na tagumpay ay hindi nasusukat sa halaga ng pera kundi sa pagpapahalaga sa sakripisyo ng pamilya.
Sa bawat tig-₱20 na iniipon niya, dala-dala ni Carlo ang pagmamahal at pag-asa na balang araw, hindi na kailangan pang lumayo ng kanyang ina para sa kanilang ikabubuhay.
Walang komento:
Mag-post ng isang Komento